Son de Estrelas

Desde onte, os seguidores de Son de estrelas teñen unha nova oportunidade para escoitar aos seus concursantes favoritos. Voz de tarde, o programa estrela das tardes de Radio Voz (de 16 a 20 horas) conta no seu repertorio con novos temas e intérpretes. Todos os duetos do concurso musical que emite TVG cada sábado en horario estelar poderán ser solicitados polos oíntes da emisora.

O espazo, conducido por Esther López e elixido por moitas persoas para escoitar as súas cancións preferidas, pon a disposición do seu público as interpretacións dos participantes de Son de estrelas; dos que seguen na competición e dos que xa foron eliminados. «é unha forma de promocionar ao representante da súa comarca. Se alguén non puido ver a interpretación do sábado, pedindo a súa canción a través da radio pode difundir a actuación do seu candidato e conseguir que acaben votando por el», explica López.

Son de estrelas, producido por Voz Audiovisual, entrou na segunda etapa do concurso e os 12 finalistas acompañarán durante moitas semanas aos espectadores de TVG. «é posible que acaben triunfando as cancións de Son de estrelas», engade a presentadora.

Fonte: A voz